തിരുവനന്തപുരം: പാളയം ഫൊറോന സാമൂഹ്യ ശുശ്രൂഷയുടെ വാർഷിക ആഘോഷങ്ങൾ വെള്ളയമ്പലം സെന്റ് ആന്റണീസ് ഹാളിൽ വച്ച് 14 ജൂൺ, ഞായറാഴ്ച സമുചിതമായി ആഘോഷിച്ചു. കോർഡിനേറ്റർ ഫാ. ബാബുരാജിന്റെ അധ്യക്ഷതയിൽ കൂടിയ സമ്മേളനം രൂപത ടി.എസ്.എസ്.എസ്. അസിസ്റ്റന്റ് ഡയറക്ടർ ഫാ. ഡോണി ഡി പോൾ ഉദ്ഘാടനം ചെയ്തു. ചടങ്ങിൽ രൂപത കപ്പാസിറ്റി കോർഡിനേറ്റർ ലീജ സ്റ്റീഫൻ, ഫൊറോന ഇൻചാർജ് കോർഡിനേറ്റർ കാവ്യ എന്നിവർ ആശംസയേകി. ഫൊറോന വാർഷിക റിപ്പോർട്ട് ശ്രീമതി മേരി സെലിൻ അവതരിപ്പിച്ചു.
പ്ലാൻ & ബഡ്ജറ്റ് പ്രകാരം ഫൊറോനയിൽ മികച്ച രീതിയിൽ പ്രവർത്തനം കാഴ്ചവച്ച് ഒന്നാം സ്ഥാനം കരസ്ഥമാക്കിയ തൈക്കാട്, രണ്ടാം സ്ഥാനം നേടിയ മണക്കാട്, മൂന്നാം സ്ഥാനം പങ്കിട്ട കുറവൻകോണം, മുടവൻമുകൾ എന്നീ 4 ഇടവകകളെയും, മുതിർന്ന 5 പ്രവാസി എക്സിക്യൂട്ടീവ് അംഗങ്ങളെയും ചടങ്ങിൽ ആദരിച്ചു. കൂടാതെ ഫൊറോനയിലെ ഭിന്നശേഷിക്കാരായ 20 വ്യക്തികൾക്ക് സ്നേഹസമ്മാനമായി ട്രാവൽ കിറ്റുകൾ വിതരണം ചെയ്തു. KRLCBC കമ്മീഷൻ ഫോർ വുമൺ മാതൃദിനത്തോടനുബന്ധിച്ച് നടത്തിയ പെൻസിൽ ഡ്രോയിങ് മത്സരത്തിൽ ഒന്നാം സ്ഥാനം കരസ്ഥമാക്കിയ ഫൊറോന എക്സിക്യൂട്ടീവ് അംഗം നിർമലയ്ക്ക് ചടങ്ങിൽ സ്നേഹോപഹാരം നൽകി.
ഫൊറോന ആനിമേറ്റർ ശ്രീമതി റീനാ ആന്റണി സന്നിഹിതയായിരുന്ന യോഗത്തിൽ ഫൊറോന വൈസ് പ്രസിഡന്റ് ഷാജി വിൻസെന്റ് സ്വാഗതം ആശംസിച്ചു. ഫൊറോന കാഷ്യർ വിജയദാസ് നന്ദി പറഞ്ഞു. പൊതുസമ്മേളനത്തിന് ശേഷം ഫൊറോനയിലെ വിവിധ ഇടവകകളുടെ നേതൃത്വത്തിൽ ലഘുനാടകം, നൃത്തങ്ങൾ, ഗ്രൂപ്പ് ഡാൻസ്, ഗാനാലാപനം തുടങ്ങിയ വൈവിധ്യമാർന്ന കലാപരിപാടികൾ അരങ്ങേറി.
