തിരുവനന്തപുരം: ചെറുപ്പം മുതൽ മനസ്സിൽ സൂക്ഷിച്ചിരുന്ന പൈലറ്റാകണമെന്ന സ്വപ്നം സാക്ഷാത്കരിച്ച് പൂന്തുറ സ്വദേശിനി കരിഷ്മ ബിൻരാജ്. ദക്ഷിണാഫ്രിക്കയിൽ വിമാനപ്പറക്കൽ പരിശീലനം വിജയകരമായി പൂർത്തിയാക്കിയ കരിഷ്മ Private Pilot Licence (PPL) സ്വന്തമാക്കി. പത്താം വയസ്സിൽ തിരുവനന്തപുരം വിമാനത്താവളത്തിൽ ഗ്രൗണ്ട് സ്റ്റാഫായി ജോലി ചെയ്തിരുന്ന ബന്ധുവായ ശ്രുതിമോൾ വിമാനയാത്രകളെയും വനിതാ പൈലറ്റുമാരെയും കുറിച്ച് പങ്കുവെച്ച അനുഭവങ്ങളാണ് കരിഷ്മയുടെ മനസ്സിൽ പൈലറ്റാകണമെന്ന ആഗ്രഹത്തിന് തുടക്കമിട്ടത്. ചെറുപ്പത്തിൽ തന്നെ മനസ്സിൽ പതിഞ്ഞ ആ സ്വപ്നം പിന്നീട് പഠനകാലത്തും കരിഷ്മ കൈവിട്ടില്ല. ഒരിക്കൽ താൻ പൈലറ്റാകുമെന്ന് സുഹൃത്തുക്കളോടും ആത്മവിശ്വാസത്തോടെ പറയാറുണ്ടായിരുന്നു.
പൂന്തുറയിലെ സാധാരണ മധ്യവർഗ കുടുംബത്തിൽ സഹായ രാജുവിന്റെയും മേരി വസന്തയുടെയും മകളായി വളർന്ന കരിഷ്മയ്ക്ക് സ്വപ്നത്തിലേക്കുള്ള യാത്ര അത്ര എളുപ്പമായിരുന്നില്ല. പരിശീലനത്തിനാവശ്യമായ സാമ്പത്തിക ചെലവും ഭാവിയിലെ തൊഴിൽസാധ്യതകളെക്കുറിച്ചുള്ള ആശങ്കകളും വലിയ വെല്ലുവിളികളായി. വ്യോമസേനയിലൂടെ പൈലറ്റ് പരിശീലനം നേടാനുള്ള ശ്രമവും ചില സാഹചര്യങ്ങളാൽ മുന്നോട്ടുകൊണ്ടുപോകാൻ കഴിഞ്ഞില്ല. എന്നാൽ പ്രതിസന്ധികൾക്കുമുന്നിൽ സ്വപ്നം ഉപേക്ഷിക്കാൻ കരിഷ്മ തയ്യാറായില്ല. 25-ാം വയസ്സിൽ തന്റെ ലക്ഷ്യത്തിലേക്കുള്ള നിർണായക ചുവടുവെപ്പ് നടത്താൻ അവർ തീരുമാനിച്ചു. വായ്പയെടുത്ത് ദക്ഷിണാഫ്രിക്കയിലെത്തി വിമാനപ്പറക്കൽ പരിശീലനം ആരംഭിച്ചു.
പരിശീലനകാലത്ത് സാമ്പത്തിക ബുദ്ധിമുട്ടുകളും മാനസിക സമ്മർദ്ദങ്ങളും ഉൾപ്പെടെ നിരവധി പ്രതിസന്ധികൾ നേരിടേണ്ടിവന്നു. എന്നിരുന്നാലും ലക്ഷ്യത്തിൽനിന്ന് പിന്നോട്ടുപോകാതെ പരിശീലനം തുടർന്നു. കഠിനാധ്വാനത്തിന്റെയും ആത്മവിശ്വാസത്തിന്റെയും ഫലമായി ഒടുവിൽ Private Pilot Licence സ്വന്തമാക്കാൻ കരിഷ്മയ്ക്ക് കഴിഞ്ഞു. “ഞാൻ എത്തിയത് ലക്ഷ്യസ്ഥാനത്തല്ല, യാത്രയുടെ തുടക്കത്തിലാണ്. എന്നാൽ ഒരിക്കലും ഉപേക്ഷിക്കാതിരുന്ന ആ പത്ത് വയസ്സുകാരിയുടെ സ്വപ്നം ഇന്ന് യാഥാർഥ്യമായതിൽ ഏറെ അഭിമാനമുണ്ട്,” കരിഷ്മ പറഞ്ഞു.
തന്റെ നേട്ടത്തിന് പിന്നിൽ ദൈവാനുഗ്രഹത്തിനും പ്രതിസന്ധിഘട്ടങ്ങളിൽ ഒപ്പം നിന്ന കുടുംബത്തിനും സുഹൃത്തുക്കൾക്കും പരിശീലകർക്കും കരിഷ്മ നന്ദി അറിയിച്ചു. ജീവിതത്തിലെ സാഹചര്യങ്ങൾ സ്വപ്നങ്ങൾക്ക് തടസ്സമാകരുതെന്നും, വൈകിയാലും സ്വന്തം ലക്ഷ്യങ്ങൾക്കായി പരിശ്രമം തുടരണമെന്നും അവർ യുവതലമുറയോട് ആഹ്വാനം ചെയ്യുന്നു. പൂന്തുറയുടെ തീരദേശ മണ്ണിൽനിന്ന് ആകാശത്തിന്റെ ഉയരങ്ങളിലേക്ക് ഉയർന്ന കരിഷ്മ ബിൻരാജിന്റെ യാത്ര, സ്വപ്നങ്ങൾക്ക് പ്രായമോ സാഹചര്യങ്ങളോ അതിരുകളാകേണ്ടതില്ലെന്ന സന്ദേശം നൽകുകയാണ്. PPL നേടിയതോടെ കരിഷ്മയുടെ പൈലറ്റ് യാത്ര അവസാനിക്കുന്നില്ല; കൂടുതൽ ഉയരങ്ങളിലേക്കുള്ള പുതിയൊരു അധ്യായത്തിനാണ് ഇപ്പോൾ തുടക്കം.
