പോത്തൻകോട്: കഴക്കൂട്ടം ഫെറോനയിലെ പോത്തൻകോട് ഇടവക നോമ്പാചരണത്തിന്റെ ഭാഗമായി വിജയപുരം രൂപതയിലെ കോട്ടയം പാമ്പാടിയിൽ സ്ഥിതിചെയ്യുന്ന അഗതി മന്ദിരം ‘അമ്മവീട്’ സന്ദർശിച്ചു. ഇടവക വികാരി ഫാ. രാജു പീറ്ററിന്റെ നേതൃത്വത്തിൽ ഇടവക ജനങ്ങൾ സമാഹരിച്ച അവശ്യസാധനങ്ങൾ അമ്മവീട്ടിലെ അന്തേവാസികൾക്ക് നൽകി . സന്ദർശനത്തിൽ ഫാ. രാജു പീറ്ററിന്റെ കാർമികത്വത്തിൽ അന്തേവാസികളോടൊപ്പം ദിവ്യബലി അർപ്പിച്ച് അവരോടൊപ്പം ഭക്ഷനത്തിൽ പങ്കുചേർന്നു. ഇടവകാംഗമായ ജെയിംസിന്റെ അറുപതാം ജന്മദിന ആഘോഷങ്ങൾക്കായി കരുതിയ തുക ‘അമ്മവീട്’ പ്രൊക്യുറേറ്റർ ജോബി അച്ചന് കൈമാറി. അപരന്റെ വേദനയിൽ പങ്കുകാരാകുവാൻ ഇടവക ജനങ്ങൾ കാണിച്ച നല്ല മനസ്സിനെ ഇടവക വികാരി അഭിനന്ദിച്ചു. പല സംസ്ഥാനങ്ങളിലുള്ള സ്ത്രീകളും പുരുഷന്മാരുമടങ്ങുന്ന160 ഓളം അന്തേവാസികൾ താമസിക്കുന്ന അഗതി മന്ദിരം ഹെറാൾഡ്സ് ഓഫ് ഗുഡ് ന്യൂസ് വൈദീകരാണ് നടത്തുന്നത്.
പോത്തൻകോട് ഇടവക നോമ്പാചരണത്തിന്റെ ഭാഗമായി അഗതി മന്ദിരം സന്ദർശിച്ചു
