വട്ടിയൂർക്കാവ് (12.08.2026): വി. ഫ്രാൻസിസ് അസ്സിനിയുടെ ജൂബിലി വർഷത്തോടനുബന്ധിച്ച് വട്ടിയൂർക്കാവ് ലിറ്റിൽ ഫ്ലവർ ദേവാലയത്തിലെ 42 വിശ്വാസികൾ പൂർണ്ണ ദണ്ഢവിമോചനം പ്രാപിച്ചു. അനുരഞ്ജന കൂദാശ സ്വീകരിക്കുകയും ദിവ്യകാരുണ്യം സ്വീകരിക്കുകയും വിശ്വാസപ്രമാണം ചൊല്ലുകയും ലെയോ പാപ്പയുടെ നിയോഗങ്ങൾക്കായി പ്രാർത്ഥിക്കുകയും ചെയ്ത ശേഷം, വിശ്വാസികൾ നെയ്യാറ്റിൻകര കാവിയക്കോട് വി. ഫ്രാൻസിസ് അസീസി ദേവാലയവും അരിയനാട് വി. ഫ്രാൻസിസ് അസീസി ആശ്രമവും സന്ദർശിച്ചു. ഇതോടെ പൂർണ്ണദണ്ഡവിമോചന ത്തിനുള്ള നിബന്ധനകൾ പൂർത്തിയാക്കി.
രണ്ട് ആത്മീയ കേന്ദ്രങ്ങളിലേക്കുള്ള സന്ദർശനം വിശ്വാസികൾക്ക് ഒരു സവിശേഷമായ ആത്മീയ അനുഭവമായി. കാവിയക്കോട്ടെ ദേവാലയത്തിൽ അസീസിയിലെ വി. ഫ്രാൻസിസിന്റെ ജീവിതത്തെയും സന്ദേശത്തെയും കുറിച്ചുള്ള മനോഹരമായ വിശദീകരണം വിശുദ്ധനെക്കുറിച്ചും പൂർണ്ണ ദണ്ഡവിമോചനത്തെക്കുറിച്ചും നല്ല ബോധ്യം നൽകി. ആശ്രമത്തിൽ കപ്പൂച്ചിൻ വൈദീകർ വി. ഫ്രാൻസിസ് അസീസിയുടെ ജീവിതത്തെക്കുറിച്ച് വിശദമായി സംസാരിച്ചു. ഈ പ്രത്യേക ദൈവാനുഗ്രഹമായ പൂർണ്ണ ദണ്ഡവിമോചനത്തിന് ദൈവത്തോടും സഭയോടും വിശ്വാസികൾ നന്ദി പ്രകടിപ്പിച്ചു.