വലിയതുറ: വലിയതുറ ഫൊറോന സാമൂഹ്യ ശുശ്രൂഷ സമിതിയുടെ നേതൃത്വത്തിൽ സമിതിയുടെ കീഴിൽ പ്രവർത്തിക്കുന്ന സ്വയംസഹായ സംഘങ്ങൾക്ക് വായ്പ വിതരണ മേള നടത്തി. ജൂലൈ 23 ബുധനാഴ്ച വലിയതുറ കമ്മ്യൂണിറ്റി ഹാളിൽ വച്ച് സംഘടിപ്പിച്ച പരിപാടിയിൽ ഫെറോന കോഡിനേറ്റർ ഫാ. ബിജിൻ ബസിലി അദ്ധ്യക്ഷത വഹിച്ചു. അതിരൂപത സാമൂഹ്യ ശുശ്രൂഷ ഡയറക്ടർ ഫാ. ആഷ്‌ലിൻ ജോസ് മേള ഉദ്ഘാടനം ചെയ്തു. സ്ത്രീകളുടെ സാമൂഹൃരാഷ്ട്രീയ സാമ്പത്തീക മുന്നേറ്റത്തിലെ നേതൃത്വ പാടവത്തെ കുറിച്ചും, സാമ്പത്തിക സാക്ഷരത കൈവരിക്കേണ്ട ആവശ്യതകളെ കുറിച്ചും, സംരംഭത്വ ശേഷി വികസനത്തെ കുറിച്ചും അദ്ദേഹം തന്റെ ഉദ്ഘാടന പ്രസംഗത്തിൽ വിവരിച്ചു.
ബാങ്ക് ഓഫ് ഇന്ത്യ തിരുവല്ലം ബ്രാഞ്ച് സീനിയർ മാനേജർ പ്രവീൺ 10 ഗ്രൂപ്പുകൾക്കുമായുള്ള വായ്പ തുകയായ ഒരു കോടി രൂപയുടെ ചെക്ക് വിതരണം ചെയ്തു. വലിയതുറ ഇടവക സഹവികാരി ഫാ. ഫ്രെഡി ആശംസകൾ അർപ്പിച്ച് സംസാരിച്ചു. ‘വായ്പയും തിരിച്ചടവും’ എന്നതിന്മേൽ രൂപത SHG കോഡിനേറ്റർ രാജമണി വിശദീകരിച്ചു. SHG ഫോറോന പ്രസിഡന്റ് പ്രഭ, സെക്രട്ടറി ലിസി, ട്രഷർ മിനി ജോയ് എന്നിവർ സന്നിഹിതരായിരുന്ന പരിപാടിയിൽ ആനിമേറ്റർ ഷീജ നന്ദി അർപ്പിച്ചു.
