വെള്ളയമ്പലം: യേശുവിന്റെ വ്യക്തിത്വത്തിലേക്ക് വളരുവാൻ കുട്ടികളെ പരിശീലിപ്പിക്കുന്ന സംഘടനയായ കെ.സി.എസ്.എൽ തിരുവനന്തപുരം അതിരൂപതയിൽ പുതിയ അധ്യായന വർഷത്തിന്റെ ഉദ്ഘാടനവും ആനിമേറ്റേഴ്സിന്റെ സമ്മേളനവും നടത്തി. ജൂൺ 23 തിങ്കളാഴ്ച വെള്ളയമ്പലത്ത് കെ.സി.എസ്.എൽ അതിരൂപത എക്സിക്യുട്ടീവ് സെക്രട്ടറി ഫാ. നിജു അജിത് പതാക ഉയർത്തി. പ്രസിഡൻ്റ് മേരി റാണി ടീച്ചർ കുട്ടികൾക്ക് പ്രതിഷ്ഠാജപം ചൊല്ലികൊടുക്കുകയും, കെ.സി.എസ്.എൽ ആന്തം ഏവരും ആലപിക്കുകയും ചെയ്തു.തുടർന്ന് നടന്ന സമ്മേളനത്തിൽ ഫാ.നിജു അജിത്ത് അദ്ധ്യക്ഷത വഹിച്ചു. അതിരൂപത ശൂശ്രൂഷ കോഡിനേറ്റർ ഫാ. ലോറൻസ് കുലാസ് പുതിയ അദ്ധ്യായന വർഷം ഉദ്ഘാടനം ചെയ്തു. കെ.സി. എസ്.എൽ ജനറൽ സെക്രട്ടറി മാസ്റ്റർ ശ്രേയസ്സ് ആശംസകൾ അർപ്പിച്ചു. യോഗത്തിൽ സന്നിഹിതരായ ഏവർക്കും കെ.സി. എൽ. എക്സികുട്ടീവ് എച്ച്. എസ് ആനിമേറ്റർ ദിനേശ് നായകം നന്ദി പ്രകാശിപ്പിച്ചു.
ആനിമേറ്റേഴ്സിന്റെ കൂടിവരവിൽ വിദ്യാർത്ഥികളെ നയിക്കുന്നതിനെ കുറിച്ചുള്ള ക്ലാസിന്‌ മാർട്ടിൻ പയ്യപള്ളി നേതൃത്വം നൽകി. ആനിമേറ്റേഴ്സിൻ്റെ ചുമതലകളെയും കുട്ടികളിന്മേലുള്ള അവരുടെ സ്വാധീനത്തെയും കുറിച്ച് 2024- 25 വർഷത്തെ ഷവലിയർ പി.ടി. തോമസ് അവാർഡ് ജേതാവും തിരുവനന്തപുരം ഹോളി ട്രിനിറ്റി സ്കൂൾ പ്രിൻസിപ്പിളുമായ ഡാമിയാൻ ജോർജ് ആനിമേറ്റേഴ്സിന് നിർദ്ദേശങ്ങൾ നൽകി. ഇതേസമയം സെൻ്റ് ആൻ്റണീസ് ഹാളിൽ കുട്ടികൾക്കായി നടന്ന ക്ലാസ്സുകൾക്ക് സജിത്ത്, അൻസാരി എന്നിവർ നേതൃത്വം നൽകി.