കൊച്ചി: തീരനിയന്ത്രണ വിജ്ഞാപനത്തിലെ (സി.ആർ.ഇസഡ്) നിലവിലെ ഇളവുകൾക്ക് അനുസൃതമായി നിർമ്മാണം അനുവദനീയമായിട്ടും, നേരത്തെ നിർമ്മിച്ച വീടുകൾക്ക് സ്ഥിരം നമ്പർ ലഭിക്കാത്ത സാഹചര്യം പരിഹരിക്കണമെന്ന് കെ.എൽ.സി.എ ആവശ്യപ്പെട്ടു. ഇതിനായി തീരദേശ തദ്ദേശ സ്വയംഭരണ സ്ഥാപനങ്ങളിൽ ശ്രദ്ധക്ഷണിക്കൽ സമ്മേളനങ്ങൾക്കും ജനകീയ ഒപ്പുശേഖരണത്തിനും തുടക്കമായി.
നിലവിൽ അനുവദനീയമായ നിർമ്മാണങ്ങളാണെങ്കിൽപ്പോലും മുൻപ് നിർമ്മിച്ചതാണെന്ന സാങ്കേതിക കാരണത്താൽ ക്രമവൽക്കരണം സാധ്യമാകാത്ത നിരവധി കുടുംബങ്ങൾ തീരദേശ മേഖലകളിലുണ്ട്. ഇവരുടെ വീടുകൾ ക്രമവൽക്കരിക്കുന്നതിന് കേന്ദ്ര-സംസ്ഥാന സർക്കാരുകൾ അടിയന്തര നടപടി സ്വീകരിക്കണമെന്ന് സമ്മേളനങ്ങൾ ആവശ്യപ്പെട്ടു.കേരളത്തിലെ 175 തീരദേശ പഞ്ചായത്തുകളെയും സി.ആർ.ഇസഡ്-2 വിഭാഗത്തിൽ ഉൾപ്പെടുത്തണമെന്ന് സംസ്ഥാന സർക്കാർ ശുപാർശ ചെയ്തിരുന്നെങ്കിലും നിലവിൽ 66 പഞ്ചായത്തുകൾ മാത്രമാണ് ഈ വിഭാഗത്തിൽ ഉൾപ്പെട്ടിട്ടുള്ളത്. ശേഷിക്കുന്ന പഞ്ചായത്തുകളെയും സി.ആർ.ഇസഡ്-2 പരിധിയിൽ ഉൾപ്പെടുത്തണമെന്നും ദ്വീപുകൾക്കായി സംയോജിത ദ്വീപ് മാനേജ്മെന്റ് പ്ലാൻ (ഐ.ഐ.എം.പി) നടപ്പാക്കുന്നതിന് അടിയന്തര നടപടികൾ സ്വീകരിക്കണമെന്നും സമ്മേളനങ്ങളിൽ ആവശ്യപ്പെട്ടു.
ശ്രദ്ധക്ഷണിക്കൽ സമ്മേളന പരമ്പരയിലെ ആദ്യ സമ്മേളനം ഏഴിക്കര പഞ്ചായത്തിലെ കടക്കരയിൽ നടന്നു. കെ.എൽ.സി.എ കോട്ടപ്പുറം രൂപത പ്രസിഡന്റ് അനിൽ കുന്നത്തൂർ അധ്യക്ഷത വഹിച്ചു. കോട്ടപ്പുറം രൂപത പി.ആർ.ഒ. ഫാ. മിഥുൻ മെൻഡസ് ഉദ്ഘാടനം ചെയ്തു. കെ.എൽ.സി.എ സംസ്ഥാന പ്രസിഡന്റ് അഡ്വ. ഷെറി ജെ. തോമസ് ശ്രദ്ധക്ഷണിക്കൽ പ്രസംഗം നടത്തി.കെ.എൽ.സി.എ സംസ്ഥാന ജനറൽ സെക്രട്ടറി ബിജു ജോസി കരുമാഞ്ചേരി, സംസ്ഥാന വൈസ് പ്രസിഡന്റ് അലക്സ് താളൂപാടത്ത്, കോട്ടപ്പുറം രൂപത ജനറൽ സെക്രട്ടറി ജോൺസൻ വാളൂർ, വൈസ് പ്രസിഡന്റ് ഡഗ്ലസ്, സെക്രട്ടറി ജെയിംസ്, കടക്കര യൂണിറ്റ് പ്രസിഡന്റ് ജിജോ കല്ലറയ്ക്കൽ, യൂണിറ്റ് സെക്രട്ടറി സോണി കെ.ജി എന്നിവർ പ്രസംഗിച്ചു.
