പേട്ട: ട്രിവാൻഡ്രം സോഷ്യൽ സർവീസ് സൊസൈറ്റിയുടെ ആഭിമുഖ്യത്തിൽ പേട്ട ഫെറോനാ സാമൂഹ്യ ശുശ്രൂഷ ചൈൽഡ് പാർലമെന്റിന്റെ നേതൃത്വത്തിൽ ലഹരിവിരുദ്ധ വാക്കത്തോൺ സംഘടിപ്പിച്ചു. കുമാരപുരം പത്താം പീയൂസ് ദേവാലയത്തിൽ നിന്നും ദീപശിഖ പ്രയാണത്തോടെ ആരംഭിച്ച വാക്കത്തോണിന്റെ ഉദ്ഘാടനം സാമൂഹ്യ ശുശ്രൂഷ കോർഡിനേറ്റർ ഫാ. പോൾ പഴങ്ങാട്ടിന്റെ അധ്യക്ഷതയിൽ ഫെറോന വികാരി ഫാ. റോഡ്രിഗസ് കുട്ടി ദീപശിഖ തെളിയിച്ചുകൊണ്ട് നിർവഹിച്ചു. സാമൂഹ്യ ശുശ്രൂഷ അസിസ്റ്റന്റ് ഡയറക്ടർ ഫാ. ടോണി ഡി പോൾ, ഫെറോന സെക്രട്ടറി ഫാ. ഇമ്മാനുവൽ, ഫറോനാ സാമൂഹ്യ ശുശ്രൂഷാ സെക്രട്ടറി ത്രേസ്യ എന്നിവർ സന്ദേശങ്ങൾ നൽകി.
ലഹരിവിരുദ്ധ സന്ദേശങ്ങളുള്ള ബാനറുകളും പ്ലക്കാർഡുകളും ഉയർത്തി ലഹരിവിരുദ്ധ സന്ദേശം പ്രചരിപ്പിച്ചുകൊണ്ട് നടന്ന റാലി കുമാരപുരത്തു നിന്നുമാരംഭിച്ച് ദന്തൽ കോളേജിന്റെ പരിസരത്ത് സമാപിച്ചു. ലഹരിമുക്ത സമൂഹം സൃഷ്ടിക്കുന്നതിൽ കുട്ടികളുടെ പങ്കാളിത്തം ശക്തിപ്പെടുത്തുക എന്ന ലക്ഷ്യത്തോടെ സംഘടിപ്പിച്ച പരിപാടിയിൽ ജനപ്രതിനിധികൾ, ചൈൽഡ് പാർലമെന്റ് അംഗങ്ങൾ, അധ്യാപകർ, മാതാപിതാക്കൾ, സോഷ്യൽ ആക്ഷൻ മിനിസ്ട്രി പ്രവർത്തകർ എന്നിവർ പങ്കെടുത്തു. പരിപാടിയുടെ വിജയത്തിനായി എത്തിയ എല്ലാവർക്കും സംഘാടകർ നന്ദി രേഖപ്പെടുത്തി. ലഹരിക്കെതിരെ നടത്തിയ ഡ്രാമ ഡാൻസ്, ഫ്ലാഷ് മോബ്, ലഹരിവിരുദ്ധ ഗാനം എന്നിവ പരിപാടിയെ അർഥവത്താക്കി ഏവരുടെയും ശ്രദ്ധ പിടിച്ചുപറ്റി.
