പുതുക്കുറിച്ചി: അധ്യാപക ദിനത്തോടനുബന്ധിച്ച് പുതുക്കുറിച്ചി സെൻ്റ് മൈക്കൽസ് ഇടവക ആ നാട്ടിലെ വിരമിച്ച അധ്യാപകർ ഉൾപ്പെടെ എല്ലാ അധ്യാപകരെയും ആദരിച്ചു. കെ എൽ സി എ യുടെയും അല്മായ ശുശ്രൂഷാ സമിതിയുടെയും പുതുക്കുറിച്ചി ഇടവക കൗൺ സിലിൻ്റെയും സംയുക്ത സഹകരണത്തോടെയൊണ് ഈ ചടങ്ങ് സംഘടിപ്പിച്ചത്. പുതുക്കുറിച്ചി സെൻ്റ്. മൈക്കൽസ് ദേവാലയത്തിൽ നടന്ന ഭക്തിസാന്ദ്രമായ ദിവ്യബലി മധ്യേയാണ് ആദരിക്കൽ ചടങ്ങ് നടന്നത്. ഇടവക വികാരി റവ ഡോ. മൈക്കൽ തോമസ് അധ്യാപക ദിനത്തിൻ്റെ പ്രാധാന്യത്തെക്കുറിച്ചും ഗുരുധർമത്തിൻ്റെ പ്രസക്തിയെക്കുറിച്ചും പുതിയ കാലഘട്ടത്തെ അത് എങ്ങനെ പ്രകാശപൂർണ്ണമാക്കുന്നു എന്നതിനെക്കുറിച്ചും തൻ്റെ ആശംസാ സന്ദേശത്തിൽ വ്യക്തമാക്കി. പുതിയ തലമുറയെ വാർത്തെടുക്കാൻ അധ്യാപകർ നടത്തുന്ന ത്യാഗനിഷ്ഠമായ സേവനം ഇടവക ഒന്നാകെ നന്ദിയോടെ ഓർക്കുന്നുവെന്ന് അച്ചൻ വെളിപ്പെടുത്തി. വചനാധിഷ്ഠിതമായ ജീവിതം കൊണ്ട് നന്മയുള്ള സമൂഹം കെട്ടിപ്പടുക്കുന്നതിൽ അധ്യാപകരുടെ പങ്ക് വളരെ വലുതാണെന്ന് സഹവികാരി ഫാ. നിതേഷ് വിൻസെന്റ് തൻ്റെ ആശംസയിൽ ഓർമിപ്പിച്ചു. തുടർന്ന് , ഈ ഇടവകയിലുള്ള വിവിധ സ്കൂളുകളിലുൾപ്പെടെ സേവനമനുഷ്ഠിക്കുന്ന ഇടവകക്കാരായ എല്ലാ അധ്യാപകരെയും വിരമിച്ച അധ്യാപകരെയും മതബോധന അധ്യാപകരെയും പാരിതോഷികം നൽകി ആദരിച്ചു. വിരമിച്ച അധ്യാപകരെ പൊന്നാടയണിയിച്ച് ഇടവകയുടെ നന്ദി നിറഞ്ഞ സ്നേഹം പ്രകടമാക്കി. ഇടവക സ്കൂളായ സെൻ്റ് മൈക്കിൽസ് സ്കൂളിൽ അവിടത്തെ എല്ലാ അധ്യാപകരെയും ആദരിക്കുന്ന മറ്റൊരു ചടങ്ങും നടന്നു. ഇടവക വികാരിയും സഹവികാരിയും പാരീഷ് കൗൺസിലും പൂർവ വിദ്യാർഥി പ്രതിനിധികളുമടങ്ങുന്ന വലിയൊരു സംഘം ഈ ചടങ്ങിൽ പങ്കെടുത്തു. റവ. ഡോ. മൈക്കൽ തോമസച്ചൻ ആദരിക്കൽ ചടങ്ങിന് നേതൃത്വം വഹിച്ചു.
പുതുക്കുറിച്ചി ഇടവകയിൽ അധ്യാപകദിനം ആചരിച്ചു
