തിരുവനന്തപു:രം തിരുവനന്തപുരം ലത്തീൻ അതിരൂപത കുടുംബപ്രേഷിത ശുശ്രൂഷയുടെ നേതൃത്വത്തിൽ 2026 ജൂലൈ 26-ന് വിശുദ്ധ അന്നയുടെയും വിശുദ്ധ യോവാക്കിമിന്റെയും തിരുനാൾ ദിനത്തോടനുബന്ധിച്ച് അതിരൂപതയിലെ എല്ലാ ഇടവകകളിലും മുത്തശ്ശി മുത്തശ്ശന്മാരുടെ ദിനം സമുചിതം ആചരിച്ചു. കുടുംബങ്ങളിൽ വിശ്വാസത്തിന്റെയും സ്നേഹത്തിന്റെയും മൂല്യങ്ങൾ തലമുറകളിലേക്ക് കൈമാറുന്നതിൽ മുത്തശ്ശി -മുത്തശ്ശന്മാരുടെ മഹത്തായ പങ്ക് അനുസ്മരിച്ചുകൊണ്ട് എല്ലാ ഇടവകകളിലും അവർക്കായി പ്രത്യേക ദിവ്യബലി അർപ്പിച്ചു. തിരുവനന്തപുരം ലത്തീൻ അതിരൂപത മെത്രാപ്പോലീത്ത തോമസ് ജെ. നെറ്റോ ചാമ്പാവ് ഇടവകയിൽ ദിവ്യബലി അർപ്പിക്കുകയും മുത്തശ്ശി മുത്തശ്ശന്മാരെ പൊന്നാട അണിയിച്ച് ആദരിക്കുകയും ചെയ്തു.
ഇടവകകളിൽ മുത്തശ്ശി മുത്തശ്ശന്മാരെ ആദരിച്ച് ഉപഹാരങ്ങൾ വിതരണം ചെയ്തു. സ്നേഹവിരുന്ന് സംഘടിപ്പിക്കുകയും വിവിധ കലാപരിപാടികളിലൂടെ അവരെ ആദരിക്കുകയും സന്തോഷിപ്പിക്കുകയും ചെയ്തു. കൊച്ചുമക്കൾ മുത്തശ്ശിമുത്തശ്ശന്മാർക്കു ആശംസകൾ അർപ്പിച്ച് സ്നേഹവും നന്ദിയും പ്രകടിപ്പിച്ചത് ആഘോഷത്തിന് കൂടുതൽ മിഴിവേകി. മുതിർന്ന തലമുറയും യുവതലമുറയും തമ്മിലുള്ള ബന്ധം കൂടുതൽ ശക്തമാക്കുക എന്നതാണ് ഈ ദിനാചരണത്തിന്റെ മുഖ്യ ലക്ഷ്യം. കുടുംബങ്ങളിൽ മുതിർന്നവർ നൽകുന്ന സ്നേഹത്തെയും ജ്ഞാനത്തെയും പുതുതലമുറയ്ക്ക് പരിചയപ്പെടുത്താൻ ഈ അവസരം വിനിയോഗിക്കണമെന്ന് ലിയോ പാപ്പാ ദിനാചരണ സന്ദേശത്തിൽ ആഹ്വാനം ചെയ്തിരുന്നു.