ആർച്ച്ബിഷപ്പ് ഫുൾട്ടൻ ജെ. ഷീന്റെ വാഴ്ത്തപ്പെട്ട പദവി പ്രഖ്യാപനം 2026 സെപ്റ്റംബർ 24-ാം തീയതി അമേരിക്കയിലെ മിസോറിയിലുള്ള സെന്റ് ലൂയിസ് നഗരത്തിലെ ‘ദി ഡോം അറ്റ് അമേരിക്കാസ് സെന്ററിൽ’ നടക്കും. സെന്റ് ലൂയിസ് സമയം ഉച്ചകഴിഞ്ഞ് 2:00 മണിക്ക് (റോം സമയം രാത്രി 9:00 മണി) വാഴ്ത്തപ്പെട്ട പദവി പ്രഖ്യാപന ദിവ്യബലി ആരംഭിക്കും. വത്തിക്കാൻ പ്രതിനിധിയായ കർദിനാൾ ലൂയിസ് അന്റോണിയോ ടാഗ്ലെ തിരുക്കർമ്മങ്ങൾക്ക് മുഖ്യകാർമ്മികത്വം വഹിക്കും. ദിവ്യബലിക്ക് മുന്നോടിയായി രാവിലെ മുതൽ പ്രത്യേക പ്രാർത്ഥനാ ശുശ്രൂഷകളും സംഗീതപരിപാടികളും എക്സ്പോയും ഉണ്ടായിരിക്കും. റേഡിയോ, ടെലിവിഷൻ മാധ്യമങ്ങളിലൂടെ സുവിശേഷം പ്രഘോഷിക്കുന്നതിൽ വലിയ പങ്കുവഹിച്ച വ്യക്തിയാണ് ആർച്ച്ബിഷപ്പ് ഫുൾട്ടൻ ജെ. ഷീൻ.
1950-60 കളില് അമേരിക്കയിലെ സംപ്രേഷണം ചെയ്ത “ലൈഫ് ഈസ് വര്ത്ത് ലിവിംഗ്” എന്ന ഏറ്റവും ജനപ്രീതിയാര്ജ്ജിച്ച ടെലിവിഷന് വചന പ്രഘോഷണ പരിപാടിയുടെ പേരിലാണ് ഫുള്ട്ടന് ജെ. ഷീന് അനേകായിരങ്ങള്ക്ക് പരിചിതനാകുന്നത്. ദശലക്ഷകണക്കിന് ആളുകളാണ് ഈ പരിപാടി കണ്ടിട്ടുള്ളത്. മരണശേഷവും അദ്ദേഹത്തിനെ വചന പ്രഘോഷണ ഭാഗങ്ങള് പുനഃസംപ്രേഷണം ചെയ്തുകൊണ്ടിരിക്കുന്നുണ്ടെന്നത് ശ്രദ്ധേയമാണ്. 1895-ല് അമേരിക്കയിലെ ഇല്ലിനോയിസില് ജനിച്ച ഷീന് തന്റെ ഇരുപത്തിനാലാമത്തെ വയസ്സില് പൗരോഹിത്യ പട്ടം സ്വീകരിച്ചു. 1951-ല് ന്യൂയോര്ക്കിലെ സഹായക മെത്രാനായി നിയമിതനായി. 1966-ല് റോച്ചെസ്റ്റര് രൂപതയുടെ മെത്രാനായി. മൂന്നു വര്ഷങ്ങള്ക്ക് ശേഷം ആര്ച്ച് ബിഷപ്പ് പദവിയിലേക്ക് ഉയര്ത്തപ്പെട്ടു. 1979-ല് ന്യൂയോര്ക്ക് സിറ്റിയില് വെച്ചാണ് അദ്ദേഹം നിത്യസമ്മാനത്തിന് വിളിക്കപ്പെട്ടത്. വിശുദ്ധമായ ജീവിതം കൊണ്ടും സുവിശേഷ തീക്ഷ്ണത കൊണ്ടും അനേകായിരങ്ങളെ പ്രകാശത്തിലേക്ക് നയിച്ച ഫുള്ട്ടന് ജെ. ഷീന്റെ നാമകരണ നടപടികള്ക്ക് 2002-ല് ആരംഭമായി.
2010-ല് ജീവന്റെ അടയാളങ്ങളൊന്നും കാണിക്കാതെ മരിച്ച നിലയില് കണ്ടെത്തിയ ജെയിംസ് എങ്ങ്സ്ട്രോം എന്ന കുട്ടി അത്ഭുതകരമായി ജീവിതത്തിലേക്ക് തിരികെ വന്നതാണ് ഷീനിനെ വാഴ്ത്തപ്പെട്ടവരുടെ ഗണത്തിലേക്ക് ഉയര്ത്തുവാന് കാരണമായ അത്ഭുതം. ഫുള്ട്ടന് ജെ ഷീനിന്റെ മാധ്യസ്ഥം അപേക്ഷിച്ച് പ്രാര്ത്ഥിച്ചതോടെയാണ് വൈദ്യശാസ്ത്രം മരിച്ചതായി പ്രഖ്യാപിച്ച കുട്ടി ജീവിതത്തിലേക്ക് തിരികെ വന്നതെന്ന് മാതാപിതാക്കള് സാക്ഷ്യപ്പെടുത്തിയിട്ടുണ്ട്. ഏറ്റവും ജനപ്രീതിയാര്ജ്ജിച്ച ടിവി വ്യക്തിത്വത്തിനുള്ള ‘എമ്മി’ അവാര്ഡ് രണ്ടു പ്രാവശ്യം ഷീന് മെത്രാപ്പോലീത്തക്ക് ലഭിച്ചിരിന്നു.
