വത്തിക്കാന് സിറ്റി: കൂദാശകളുടെ പരികര്മത്തില് മാത്രം ശ്രദ്ധ കേന്ദ്രീകരിച്ചിരുന്ന പരമ്പാരഗത ശൈലിയില് നിന്ന് ഇടവകയിലെ അജപാലന പ്രവര്ത്തനങ്ങള് മാറേണ്ടതുണ്ടെന്ന് ലെയോ പാപ്പ. സമൂഹം വഴിയോ കുടുംബം വഴിയോ വിശ്വാസം അടുത്ത തലമുറയിലേക്ക് താനേ കൈമാറ്റം ചെയ്യപ്പെടുമെന്ന പഴയ ധാരണ ഇനി പ്രസക്തമല്ലെന്ന് പാപ്പ ഓര്മ്മിപ്പിച്ചു. മാറിയ കാലഘട്ടില് സുവിശേഷ പ്രഘോഷണത്തിലൂടെയുള്ള വിശ്വാസ കൈമാറ്റത്തിന് അടിയന്തിരപ്രാധാന്യം നല്കണമെന്നും റോമാ രൂപതയിലെ വൈദികരുമായി നടത്തിയ കൂടിക്കാഴ്ചയില് പാപ്പ വ്യക്തമാക്കി.
പോള് ആറാമന് ഹാളില് നടന്ന കൂടിക്കാഴ്ചയില് പാപ്പ സഭ നേരിടുന്ന വെല്ലുവിളികളെക്കുറിച്ച് സംസാരിച്ചു. മാമ്മോദീസ സ്വീകരിച്ച ഒരു വിഭാഗമാളുകള്ക്ക് സഭയുമായുള്ള ബന്ധം അനുഭവവേദ്യമാകുന്നില്ലെന്ന് എളിമയോടെ നാം മനസിലാക്കണം. ‘വിശ്വസിക്കാത്ത ഒരാള്ക്ക് എങ്ങനെ പ്രാര്ത്ഥിക്കാന് കഴിയും? പ്രഘോഷിക്കുന്ന ഒരാളില്ലാതെ എങ്ങനെ അവര്ക്ക് ശ്രവിക്കാന് സാധിക്കും?’ എന്ന വിശുദ്ധ പൗലോസ് അപ്പസ്തോലന്റെ വാക്കുകള് പാപ്പ ഉദ്ധരിച്ചു. കുട്ടികളെയും യുവാക്കളെയും കുടുംബങ്ങളെയും സഭാപ്രവര്ത്തനങ്ങളില് പങ്കുചേര്ക്കാന് പരിശ്രമിക്കണമെന്നും വിശ്വാസം കൈമാറുന്നതിനായി പുതിയ വഴികള് തേടണമെന്നും പാപ്പ പറഞ്ഞു. സുവിശേഷപ്രഘോഷണം ഫലപ്രദമാകണമെങ്കില് ഇടവക കൂട്ടായ്മ ഒരുമിച്ച് പ്രവര്ത്തിക്കണമെന്നും യുവജനങ്ങളെ ശ്രവിക്കാന് സമയം കണ്ടെത്തുക പ്രധാനപ്പെട്ട കാര്യമാണെന്നും പാപ്പ റോമിലെ വൈദികരെ ഉദ്ബോധിപ്പിച്ചു.