ഇരവിപുത്തൻതുറ: ഇരവിപുത്തൻതുറ സെന്റ് കാതറീൻ ദൈവാലയത്തിൽ മൂന്നു ദിവസം നീണ്ടുനിന്ന ലീജിയൻ കോൺഗ്രസ് വിവിധ പരിപാടികളോടെ സമാപിച്ചു. ഇരവിപുത്തൻതുറ കമ്മ്യൂണിറ്റി ഹാളിൽ നടന്ന പൊതുസമ്മേളനം ഫെറോന വികാരി ഫാ. സിൽവസ്റ്റർ കുരിശ് ഉദ്ഘാടനം ചെയ്തു. മരിയ സൈനികർ ദിവ്യബലിയിലെ സജീവ പങ്കാളികളാകേണ്ടതിന്റെ ആവശ്യകത അദ്ദേഹം ചൂണ്ടിക്കാട്ടി. വൈദിക കോർഡിനേറ്റർ ഫാ. മാർതോമ, ഇടവക വികാരി ഫാ. മെന്റസ് ജോസഫ് എന്നിവർ ആശംസകളർപ്പിച്ചു. ഇതോടനുബന്ധിച്ച് ലീജന്റെ പ്രാഥമിക ചുമതലകൾ, ജൂനിയർ പ്രസീദിയങ്ങൾ ഇവയുടെ പ്രവർത്തനങ്ങൾ, ഭാരവാഹികളുടെ അടിസ്ഥാന ചുമതലകൾ എന്നിവയെക്കുറിച്ചുള്ള ക്ലാസുകൾ ബ്രദർ ക്രിസ്തുദാസ്, ബ്രദർ ജെയിംസ്, ബ്രദർ റ്റെനി റോക്കി,സിസ്റ്റർ പ്രമീള എന്നിവർ നയിച്ചു. കൂടാതെ ബ്രദർ ജോസഫ്, സിസ്റ്റർ സിറ എന്നിവർ പരിശുദ്ധ അമ്മയുടെ അത്ഭുതങ്ങളും ജീവിതത്തിൽ മാതാവിന്റെ പ്രാധാന്യവും എന്ന വിഷയത്തിന്മേൽ നടന്ന ക്ലാസുകൾക്ക് നേതൃത്വം നൽകി.
