പോങ്ങുംമൂട്: പോങ്ങുംമൂട് സെയിന്റ് മേരീസ് ഇടവകയിൽ ബൈബിൾ ഞായർ അജപാലന ശുശ്രൂഷ സമിതിയുടെ നേതൃത്വത്തിൽ സമുചിതമായി ആചരിച്ചു. ദിനാചരണത്തിൽ മതബോധന വിദ്യാർത്ഥികളും അധ്യാപകരും സജീവമായി പങ്കെടുത്തു. ദിവ്യബലിയെ തുടർന്ന് മതബോധന വിദ്യാർത്ഥികളും അധ്യാപകരും തങ്ങൾക്കിഷ്ടപ്പെട്ട ദൈവവചനം ആലേഖനം ചെയ്ത പ്ലക്കാർഡുകളുമായി ബൈബിൾ റാലി നടത്തി. പ്ലക്കാർഡിൽ എഴുതിയ വചനങ്ങൾ കുഞ്ഞു മക്കൾ വേദിയിൽ ഉരുവിട്ടത് വേറിട്ട അനുഭവമായി.
തുടർന്ന് വിദ്യാർത്ഥികൾക്കായി വിവിധ ബൈബിൾ മത്സരങ്ങൾ നടത്തി. സങ്കീർത്തനാലാപനം, സങ്കീർത്തനം ചൊല്ലൽ, ബൈബിൾ പാരായണം തുടങ്ങി ബൈബിളധിഷ്ടിത പരിപാടികളിൽ മതബോധന വിദ്യാർത്ഥികൾ സജീവമായി പങ്കെടുത്തു. ഇടവകവികാരി ഫാ. ലോറൻസ് കുലാസിന്റെ സാന്നിധ്യത്തിൽ നടന്ന ബൈബിൾ ഞായർ ആഘോഷങ്ങൾക്ക് റവ.സിസ്റ്റർ മരിയ ആൻസി നേതൃത്വം നൽകി.
