വെട്ടുതുറ: വിശുദ്ധ ഫ്രാൻസിസ് അസീസിയുടെ ജൂബിലി വർഷത്തോടനുബന്ധിച്ച് കെ.സി.വൈ.എം. പുതുക്കുറിച്ചി ഫൊറോനയുടെ ആഭിമുഖ്യത്തിൽ ‘ലൂമെൻ ’26: ദി സാൻ ഡാമിയാനോ എൻകൗണ്ടർ’ (Lumen ’26: The San Damiano Encounter) എന്ന പേരിൽ തായ്സെ പ്രാർത്ഥനാ ശുശ്രൂഷ സംഘടിപ്പിച്ചു. മെയ് 24 പെന്തക്കോസ്ത തിരുനാൾ ദിനത്തിൽ വൈകുന്നേരം 6 മണിക്ക് വെട്ടുതുറ സെന്റ് സെബാസ്റ്റ്യൻസ് ദേവാലയത്തിലായിരുന്നു പരിപാടി. പെന്തക്കോസ്ത ജാഗരണത്തിന്റെ മാതൃകയിൽ ദേവാലയത്തിന് പുറത്ത് നിന്ന് പരിശുദ്ധാത്മാവിനെ വിളിച്ചപേക്ഷിച്ചുകൊണ്ടുള്ള ‘Veni Creator Spiritus’ (വേനി ക്രിയേറ്റർ സ്പിരിത്തൂസ്) എന്ന പുരാതന ലത്തീൻ ഗീതത്തിന്റെ അകമ്പടിയോടെ യുവജനങ്ങൾ ദേവാലയത്തിലേക്ക് പ്രവേശിച്ച ചടങ്ങ് അതീവ ഭക്തിസാന്ദ്രമായ അന്തരീക്ഷമൊരുക്കി.
വിശുദ്ധ ഫ്രാൻസിസ് അസീസി ക്രൂശിതനായ ക്രിസ്തുവിൽ പ്രകടിപ്പിച്ച ആഴമേറിയ സ്നേഹവും അനുഭവങ്ങളും യുവജനങ്ങളിലേക്ക് പകരുക എന്നതായിരുന്നു പ്രാർത്ഥനയുടെ മുഖ്യപ്രമേയം. മനോഹരമായി അലങ്കരിച്ച സാൻ ഡാമിയാനോ കുരിശിന് മുന്നിൽ നടന്ന ആരാധനയിൽ പ്രാരംഭ പ്രാർത്ഥനകൾ, തായ്സെ ഭജനുകൾ, സങ്കീർത്തനാലാപനം, കുരിശാരാധന എന്നിവ ഉൾപ്പെട്ടിരുന്നു.
വിശുദ്ധ ഫ്രാൻസിസിന്റെ ലാളിത്യവും ക്രൂശിത രൂപത്തിന് മുന്നിലെ സമർപ്പണവും ധ്യാനവിഷയമാക്കിയ പ്രാർത്ഥനയിൽ ഫൊറോനയുടെ വിവിധ ഇടവകയിൽ നിന്നുള്ള യുവജനങ്ങൾ പങ്കെടുത്തു. കെ.സി.വൈ.എം. ഫൊറോന സമിതിയുടെയും വെട്ടുതുറ കെ സി വൈ എം മിന്റെയും നേതൃത്വത്തിലാണ് പരിപാടിയുടെ ക്രമീകരണങ്ങൾ നടത്തിയത്.
