പേട്ട: പേട്ട ഫൊറോന സാമൂഹ്യ ശുശ്രൂഷ സമിതിയുടെ ആഭിമുഖ്യത്തിൽ ചൈൽഡ് പാർലമെന്റുകളുടെ നേതൃത്വത്തിൽ നവംബർ 16-ന് ശിശുദിനം ആഘോഷിച്ചു. പുഷ്പഗിരി പാർലമെന്റിലെ കുട്ടികളുടെ പ്രധാനമന്ത്രി എലിജ ഇഫാൻ അധ്യക്ഷത വഹിച്ച യോഗത്തിൽ കുന്നുംപുറം പാർലിമെന്റിലെ കുമാരി റിന്ന റോബർട്ട് ഭാരതാംബയായും, പുഷ്പഗിരി പാർലമെന്റംഗം ഗാന്ധിജിയായും പരിപാടിയിൽ പങ്കെടുത്തു. രൂപത സാമൂഹ്യ ശുശ്രൂഷ ഡയറക്ടർ ഫാ. ആഷ്‌ലിൻ ജോസ്, കോർഡിനേറ്റർ ഫാ. പോൾ പഴങ്ങാട്ട്, വിവിധ പാർലമെന്റുകളിൽ നിന്നുള്ള മന്ത്രിമാർ എന്നിവർ ആശംസകളേകി. കുന്നുംപുറം, മുട്ടട, കുശവർക്കൽ, പുഷ്പഗിരി, ശ്രീകാര്യം, പേട്ട എന്നീ പാർലമെന്റുകളിൽ നിന്ന് കുട്ടികൾ ആഘോഷത്തിൽ പങ്കെടുത്തു.
ദിനാചരണത്തിന്റെ ഭാഗമായി പ്രസംഗ മത്സരം, ചിത്രരചന മത്സരം എന്നിവ സംഘടിപ്പിച്ചു. വിവിധ പ്രായത്തിലുള്ള കുട്ടികൾ മത്സരത്തിൽ പങ്കെടുത്തു. വിജയികൾക്ക് സമ്മാനങ്ങൾ വിതരണം ചെയ്തു. തുടർന്ന് കുട്ടികളുടെ കലാപരിപാടികൾ ശിശുദിനാഘോഷത്തെ മനോഹരമാക്കി. ചൈൽഡ് പാർലമെന്റ് വോളന്റിയേഴ്സും ഫൊറോന സാമൂഹ്യ ശുശ്രൂഷ എക്സിക്യുട്ടിവ് അംഗങ്ങളും സന്നിഹിതരായിരുന്നു. അതിരൂപത ഡയറക്ടർ കുട്ടികൾക്ക് മധുരം വിതരണം ചെയ്തു.
