കൊച്ചി: വന്യജീവി ആക്രമണങ്ങളില് അതിജീവനത്തിനായി പൊരുതുന്ന ജനതയോട് പരിപൂര്ണ്ണ ഐക്യദാര്ഢ്യവും പ്രഖ്യാപിക്കുകയാണെന്ന് കെസിബിസി. വനം വകുപ്പിന്റെ കണക്കനുസരിച്ച് കഴിഞ്ഞ എട്ട് വര്ഷങ്ങള്ക്കുള്ളില് മാത്രം 55839 വന്യജീവി ആക്രമണങ്ങളാണ് കേരളത്തിലുണ്ടായത്. അതേ രേഖകള് പ്രകാരം ഇക്കാലയളവില് നഷ്ടപ്പെട്ട മനുഷ്യജീവനുകള് 910 ആണ്. വര്ഷങ്ങള് പിന്നിടുംതോറും വന്യജീവി ആക്രമണങ്ങളുടെ എണ്ണവും രൂക്ഷതയും വര്ദ്ധിച്ചുകൊണ്ടിരിക്കുന്ന പ്രതിഭാസമാണ് കേരളത്തിലേത്. കഴിഞ്ഞ ഒരു വര്ഷമായി വയനാട്ടിലും പരിസര ജില്ലകളിലും സംഭവിക്കുന്ന വന്യജീവി ആക്രമണങ്ങളുടെ എണ്ണം കുത്തനെ ഉയര്ന്നിട്ടുണ്ട്. കഴിഞ്ഞ ഏതാനും ആഴ്ചകളായി സമാനതകളില്ലാത്ത വന്യജീവി ആക്രമണങ്ങളാണ് അവിടങ്ങളില് നടന്നുവരുന്നത്. കഴിഞ്ഞ രണ്ടാഴ്ചയ്ക്കിടയില് മാത്രം മൂന്നുപേരുടെ ജീവന് വയനാട്ടില് നഷ്ടപ്പെട്ടിരിക്കുന്നു. വിഷയത്തില് ശാശ്വതമായ പ്രശ്നപരിഹാരത്തിനായി സമഗ്രമായ നിയമനിര്മ്മാണം നടത്തണമെന്നു കെസിബിസി ആവശ്യപ്പെട്ടു.
വന്യജീവി ആക്രമണങ്ങള് മൂലം ജീവനും സ്വത്തിനും നാശം സംഭവിക്കുകയും പരിക്കുകള് ഏല്ക്കുകയും വരുമാന നഷ്ടം സംഭവിക്കുകയും ചെയ്തിട്ടുള്ളവര്ക്ക് ഉചിതമായ നഷ്ടപരിഹാരം സമയബന്ധിതമായി നല്കുന്നതില് വീഴ്ച വരുത്തരുത്. കൂടുതല് മൃഗങ്ങള് വനം വിട്ട് ജനവാസ മേഖലകളിലേക്ക് ഇറങ്ങാതിരിക്കാനുള്ള നടപടികള് ഉടനടി സ്വീകരിക്കണം. ജനങ്ങളുടെയും വളര്ത്തു മൃഗങ്ങളുടെയും ജീവനും സാധാരണ ജനങ്ങളുടെ സ്വത്തിനും ഭീഷണിയാകുന്ന വിധത്തില് തുടര്ന്നും വന്യജീവി ആക്രമണങ്ങള് ഉണ്ടാകാതിരിക്കാനുള്ള എല്ലാ മുന്കരുതലുകളും സ്വീകരിക്കുകയും, ആവശ്യത്തിനുള്ള സേനകളെ അത്തരം മേഖലകളില് വിന്യസിക്കുകയും വേണം. ശാശ്വതമായ പ്രശ്നപരിഹാരത്തിനായി സമഗ്രമായ നിയമനിര്മ്മാണം നടത്തണം. വന്യജീവി ആക്രമണങ്ങളില് ഉറ്റവരെയും ഉടയവരെയും നഷ്ടപ്പെട്ട് വേദനയില് കഴിയുന്ന എല്ലാ കുടുംബങ്ങളോടും കേരള കത്തോലിക്കാ സഭയുടെ അനുശോചനം അറിയിക്കുന്നതോടൊപ്പം അതിജീവനത്തിനായി പൊരുതുന്ന ജനതയോട് പരിപൂര്ണ്ണ ഐക്യദാര്ഢ്യവും പ്രഖ്യാപിക്കുകയാണെന്ന് കെസിബിസി പ്രസ്താവിച്ചു.
വന്യജീവി ആക്രമണങ്ങളില് അതിജീവനത്തിനായി പൊരുതുന്ന ജനതയോട് ഐക്യദാര്ഢ്യം പ്രഖ്യാപിച്ച് കെസിബിസി
