അഞ്ചുതെങ്ങ്: കുടുംബങ്ങളുടെ ശാക്തീകരണത്തിനും വീണ്ടെടുപ്പിനുമായി ഒരു ആഴ്ച നീണ്ടുനിൽക്കുന്ന കർമ്മപരിപാടികളുമായി കുടുംബപ്രേഷിത ശുശ്രൂഷ നടത്തുന്ന പ്രഥമ ‘ഫാമിലി അഗാപ്പേ’ അഞ്ചുതെങ്ങ് ഇടവകയിൽ തുടക്കംകുറിച്ചു. അഭിവന്ദ്യ ക്രിസ്തുദാസ് പിതാവിന്റെ മുഖ്യകാർമികത്വത്തിൽ നടന്ന ദിവ്യബലിയോടെയാണ്‌ ഫാമിലി അഗാപ്പേ പരിപാടികൾക്ക് തുടക്കമായത്. ഹോം മിഷനിലെ കണ്ടെത്തലുകൾക്ക് പരിഹാരം കാണാൻ കുടുംബ ശുശ്രൂഷ ആവിഷ്ക്കരിച്ച ഫാമിലി അഗാപ്പേ അഞ്ചുതെങ്ങ് ഇടവകയിൽ ഫലപ്രദമാകട്ടേയെന്ന് ക്രിസ്തുദാസ് പിതാവ് പ്രാർഥനാശംസകൾ നേർന്നു. കുടുംബ ശുശ്രൂഷ ഡയറക്ടർ ഫാ. റിച്ചാർഡ് സഖറിയാസ്, അഞ്ചുതെങ്ങ് ഇടവക വികാരി ഫാ. സന്തോഷ് എന്നിവർ സഹകാർമ്മികരായിരുന്നു.
ദിവ്യബലിക്ക് ശേഷം നടന്ന സമ്മേളനത്തിൽ ഫാമിലി അഗാപ്പേയുടെ ഔഗ്യോഗിക ഉദ്ഘാടനം അഭിവന്ദ്യ ക്രിസ്തുദാസ് പിതാവ് നിർവ്വഹിച്ചു. ഫാമിലി അഗാപ്പേ ലക്ഷ്യംവയ്ക്കുന്ന കുടുംബങ്ങളുടെ വിശുദ്ധീകരണവും വീണ്ടെടുപ്പും സാധ്യമാക്കാൻ കുടുംബ ശുശ്രൂഷ നടത്തുന്ന പ്രയത്നങ്ങളെ അദ്ദേഹം അഭിനന്ദിച്ചു. ഫൊറോന വികാരി ഫാ. ജസ്റ്റിൻ ജൂഡിൻ, ഫൊറോനയിലെ മറ്റുവൈദീകർ, അഞ്ചുതെങ്ങ് ഇടവക അജപാലന സമിതി ഭാരവാഹികൾ തുടങ്ങിയവർ സന്നിഹിതരായിരുന്നു. ഫാമിലി അഗാപ്പേയുടെ ഭാഗമായി ഇന്ന് ഭിന്നശേഷിക്കാർ, അന്ധർ, സംസാര കേൾവി പരിമിതർ, ഓട്ടിസം ബാധിച്ചവർ, മാനസിക വെല്ലുവിളി നേരിടുന്നവർ തുടങ്ങിയവരെ കുടുംബ ശുശ്രൂഷ പ്രവർത്തകർ അവരായിരിക്കുന്ന ഇടങ്ങളിൽചെന്നു സന്ദർശിച്ചു. വിവാഹം കഴിഞ്ഞ് 10 വർഷം വരെ പൂർത്തിയാക്കിയ യുവദമ്പതികൾക്കുള്ള കുടുംബശാക്തീകരണ ക്ലാസും നടന്നു.
ഇനിയുള്ള ഒരാഴ്ചക്കാലം കുടുംബ നവീകരണ ധ്യാനം, ദിവ്യബലി, കൗൺസിലിംഗ്, കുമ്പസാരം, പ്രത്യേക ശ്രദ്ധവേണ്ടവരുടെ സന്ദർശനം, ഗർഭിണികൾക്കും അവരെ പരിചരിക്കുന്നവർക്കും വേണ്ടി നടത്തുന്ന എലീശ്വാ ധ്യാനം, കുടുംബശാക്തീകരണ ക്ലാസ്സുകൾ, സെമിനാറുകൾ, മാധ്യമ മുക്ത കുടുംബ മണിക്കൂർ ക്യാമ്പയിൻ, യുവജനങ്ങൾക്കും കൗമാരകാർക്കും വേണ്ടിയുള്ള ഇൻസ്പയറിംഗ് അഥവാ ലൈഫ് പ്രിപ്പറേഷൻ കോഴ്സ് , ആർ. സി മാട്രി മോണിയൽ ക്യാമ്പയിൻ, വിവിധ ഫോറങ്ങളുടെ രൂപീകരണം, ജൂബിലി ദമ്പതികൾക്ക് ആദരം എന്നീ കുടുംബ കേന്ദ്രീകൃത പരിപാടികൾ നടക്കും.
