തിരു: വിവിധ കായികമത്സരങ്ങളില്‍ മികച്ച നേട്ടങ്ങള്‍ കരസ്ഥമാക്കി തിരുവനന്തപുരം സെന്റ്‌. ജോസഫ്സ്‌ ഹയര്‍ സെക്കണ്ടറി സ്കൂള് അഭിമാനാര്‍ഹമായ വിജയങ്ങള്‍ കരസ്ഥമാക്കി. സംസ്ഥാനതല ജിംനാസ്റ്റിക്സ്‌ മത്സരത്തില്‍ ഏറ്റവും കൂടുതല്‍ പോയിന്റ്‌ നേടി മൂന്നാം തവണയും ചാമ്പ്യന്‍ സ്‌കൂളായി തെരഞ്ഞെടുക്കപ്പെട്ടു. 9 സ്വര്‍ണ്ണവും 6 വെള്ളിയും 7 വെങ്കലവും നേടി 70 പോയിന്റോടെയാണ്‌ സെന്റ്‌ ജോസഫ്സ്‌ സ്കൂള് നേട്ടം കൈവരിച്ചത്‌. സംസ്ഥാന സ്കൂള് ഫുട്ബോള്‍ മത്സരത്തില്‍ അണ്ടര്‍ 17 വിഭാഗത്തില്‍ ഒന്നാംസ്ഥാനം കരസ്ഥമാക്കിയ തിരുവനന്തപുരം ജില്ലാടീമിലെ 11 പ്രധാന കളിക്കാരില്‍ 8 പേരും ഈ വിദ്യാലയത്തിലെ കായികതാരങ്ങളാണ്‌. ജിംനാസ്റ്റിക്സില്‍ മൂന്നു സ്വര്‍ണ്ണം കരസ്ഥമാക്കിയ മിന്‍ഹാജ്‌ എസ്‌.സാജ്‌, രണ്ടു സ്വര്‍ണ്ണവും മൂന്നു വെള്ളിയും ഒരു വെങ്കലവും കരസ്ഥമാക്കിയ ഹരിഗോവിന്‌, മുന്നു സ്വര്‍ണ്ണവും ഒരു വെള്ളിയും ഒരു വെങ്കലവും കരസ്ഥമാക്കിയ ആദര്‍ള്‍, ഒരു സ്വര്‍ണ്ണവും ഒരു വെങ്കലവും കരസ്ഥമാക്കിയ ബാദുഷ, ഒരു വെള്ളിയും രണ്ട്‌ വെങ്കലവും കരസ്ഥമാക്കിയ ശ്രീരാഗ്‌ എസ്‌. രാജേഷ്‌, രണ്ട്‌ വെങ്കലം കരസ്ഥമാക്കിയ രോഹിത്‌ ആര്‍. ജി. എന്നീ കായിക പ്രതിഭകളെയും മറ്റ്‌ താരങ്ങളെയും സ്കൂള് അധികൃതര്‍ അഭിനന്ദിച്ചു. ഗെയിംസ്‌ ഇനങ്ങളില്‍ സംസ്ഥാന-ദേശീയതലങ്ങളില്‍ സമ്മാനാര്‍ഹരായ വിദ്യാര്‍ത്ഥികളുടെ എണ്ണത്തില്‍ വര്‍ദ്ധനവുണ്ടാകുന്നതില്‍ കായികാധ്യാപകരുടെ പങ്കും പ്രശംസാര്‍ഹമാണെന്ന്‌ അധികൃതര്‍ അഭിപ്രായപ്പെട്ടു.
കായികരംഗത്ത്‌ നേട്ടങ്ങള്‍ കൊയ്ത്‌ തിരുവനന്തപുരം സെന്റ്‌. ജോസഫ്സ്‌ സ്കൂള്
