കൊച്ചി: ജസ്റ്റിസ് ജെ.ബി കോശി കമ്മീഷന്റെ റിപ്പോര്ട്ടിലെ ശിപാര്ശകള് പരിശോധിക്കാന് ചീഫ് സെക്രട്ടറി അധ്യക്ഷനായ കമ്മിറ്റിയെ സര്ക്കാര് നിയോഗിച്ചിരിക്കുന്നത് സ്വാഗതാര്ഹമാണെന്നും തുടര്നടപടികള്ക്ക് കാലതാമസം പാടില്ലെന്നും കെസിബിസി ഐക്യ ജാഗ്രത കമ്മീഷന്. മുഖ്യമന്ത്രിക്ക് റിപ്പോര്ട്ട് സമര്പ്പിച്ച് പത്തു മാസത്തോളമാകുന്നു. എന്നാല്, ഇതുവരെയും നിയമസഭയും മന്ത്രിസഭയും ഈ വിഷയം ചര്ച്ച ചെയ്യാത്തതിലും, വിവിധ സര്ക്കാര് വകുപ്പുകള്ക്ക് കമ്മീഷന് റിപ്പോര്ട്ട് നല്കി അഭിപ്രായം ആരാഞ്ഞിട്ടും തുടര് നടപടികള് ഉണ്ടാകാതിരുന്നതിലും, റിപ്പോര്ട്ട് പൂര്ണ്ണമായി പുറത്തു വിടാത്തതിലും ക്രൈസ്തവ സമൂഹത്തിന് ശക്തമായ പ്രതിഷേധമുണ്ട്.
ചീഫ് സെക്രട്ടറിക്ക് പുറമെ പൊതുഭരണ – ന്യൂനപക്ഷ ക്ഷേമ വകുപ്പ് സെക്രട്ടറിമാരും അംഗങ്ങളായ പുതിയ സമിതി അര്ഹിക്കുന്ന ഗൗരവത്തോടെ കമ്മീഷന് റിപ്പോര്ട്ട് പരിഗണിക്കുകയും സത്വരമായ തുടര് നടപടികള് അടിയന്തര പ്രാധാന്യത്തോടെ സ്വീകരിക്കുകയും ചെയ്യുമെന്ന് പ്രതീക്ഷിക്കുന്നതായി കെസിബിസി ഐക്യ ജാഗ്രത കമ്മീഷന് സെക്രട്ടറി റവ. ഡോ. മൈക്കിള് പുളിക്കല് സിഎംഐ പുറപ്പെടുവിച്ച പത്രക്കുറിപ്പില് വ്യക്തമാക്കി.
ജെ.ബി കോശി കമ്മീഷന് റിപ്പോര്ട്ട് പൂര്ണ്ണമായി പ്രസിദ്ധീകരിക്കാന് സര്ക്കാര് തയാറാകണമെന്നും, തുടര് ചര്ച്ചകളില് ക്രൈസ്തവ സമൂഹങ്ങളുടെ ഔദ്യോഗിക പ്രതിനിധികളുടെ പ്രാതിനിധ്യം ഉറപ്പുവരുത്തണമെന്നും പ്രസ്താവനയില് ആവശ്യപ്പെട്ടു. ഇപ്പോള് സ്വീകരിച്ചിരിക്കുന്ന നടപടികള് ലോക്സഭാ ഇലക്ഷന് മുന്നില് കണ്ടുകൊണ്ടുള്ള ഒരു താത്ക്കാലിക നീക്കമല്ല എന്ന് സര്ക്കാര് തെളിയിക്കേണ്ടതുണ്ട്. കേരളത്തിലെ ക്രൈസ്തവ സമൂഹം നേരിടുന്ന തുടര്ച്ചയായ അവഗണനകള്ക്കും വിവിധ മേഖലകളിലെ പിന്നാക്കാവസ്ഥകള്ക്കും പരിഹാരം കണ്ടെത്താനുള്ള ആത്മാര്ത്ഥമായ നീക്കം ഇനിയെങ്കിലും സര്ക്കാരില്നിന്ന് ഉണ്ടാകുമെന്ന് പ്രതീക്ഷിക്കുന്നതായി പ്രസ്താവനയില് വ്യക്തമാക്കി.
