തിരുവനന്തപുരം ലത്തീൻ അതിരൂപതയുടെപുതിയ മെത്രാപ്പോലീത്തയായി വെരി. റെവ. മോൺ. തോമസ് ജെ നെറ്റോയെ നിയമിച്ചു പരി. ഫ്രാൻസിസ് പാപ്പ .ബുധനാഴ്ച വൈകുന്നേരം 4 മണിക്ക് സെന്റ് ജോസഫ്സ് കത്തീഡ്രൽ ദൈവാലയത്തിൽ വച്ച് അഭിവന്ദ്യ സൂസൈ പാക്യം പിതാവാണ് നിയമനം സംബന്ധിച്ച പ്രഖ്യാപനം നടത്തിയത്. അതെ സമയം തന്നെ റോമിലും വെരി. റെവ. മോൺ. തോമസ് ജെ നെറ്റോയെ തിരുവനന്തപുരം ലത്തീൻ അതിരൂപതയുടെ പുതിയ മെത്രാപ്പോലീത്തയായിട്ടുള്ള പ്രഖ്യാപനവും നടന്നിരുന്നു .തിരുവനന്തപുരം ലത്തീൻ അതിരൂപത അദ്ധ്യക്ഷൻ അഭിവന്ദ്യ സൂസൈ പാക്യം പിതാവിന്റെ 32- മത് മെത്രാഭിഷേക വാർഷികത്തോട് അനുബന്ധിച്ച് നടന്ന കൃതജ്ഞത ദിവ്യബലിമദ്ധ്യേയാണ് പുതിയ മെത്രാനെ നിയമിക്കുന്നതുമായി ബന്ധപ്പെട്ട പ്രഖ്യാപനം ഉണ്ടായത്. നിയുക്ത മെത്രാനെ തിരഞ്ഞെടുക്കുന്നതോടൊപ്പം സൂസപാക്യം പിതാവിന്റെ വിരമിക്കൽ പ്രഖ്യാപനവും നടന്നു . തിരുവനന്തപുരം അതിരൂപത ശുശ്രുഷ കോ ഓർഡിനേറ്ററായി പ്രവർത്തിക്കുന്നതിനിടെയാണ് മോൺ. തോമസ് ജെ നെറ്റോയെ തേടി പുതിയ ദൗത്യം എത്തിയത്. നിയുക്ത മെത്രാൻ പദവി ഏറ്റെടുക്കും വരെ സൂസൈ പാക്യം പിതാവ് സ്ഥാനം തുടരുമെങ്കിലും താത്കാലിക ചുമതല സഹായമെത്രാൻ ക്രിസ്തുദാസ് ആർ വഹിക്കും .
