എറണകുളം: ആഗോള കത്തോലിക്ക സഭയിലെ ജൂബിലി വർഷാചരണത്തോടനുബന്ധിച്ച് കെ.ആർ.എൽ.സി.ബി.സി. ഫാമിലികമ്മിഷൻ നടത്തുന്ന നേതൃസംഗമം ‘ഫമീലിയ-2’ ഒക്ടോബർ 20 തിങ്കളാഴ്ച എറണാകുളം ആശിർഭവൻ പാസ്റ്ററൽ സെന്ററിൽ നടക്കും. സംഗമത്തിൽ കേരളത്തിലെ 12 ലത്തീൻ രൂപതകളിലെയും കുടുംബശുശ്രൂഷ ഡയറക്ടർമാരും നേതൃനിരയിൽ പ്രവർത്തിക്കുന്ന സമിതിയംഗങ്ങളും, ആനിമേറ്റർമാരും, വോളന്റിയേഴ്സും, റിസോഴ്സ് പേഴ്സൻ അംഗങ്ങളും പങ്കെടുക്കും.
രാവിലെ 9 .30 മണിക്ക് ഫാ. അരുൺ മാത്യു തൈപറമ്പിലിന്റെ നേതൃത്വത്തിലുള്ള റോഡ് ബാൻഡ് നയിക്കുന്ന പാട്ട്, ചിന്ത, പ്രാർഥന എന്നിവയോടുകൂടിയാണ് സംഗമം ആരംഭിക്കുന്നത്. തുടർന്ന് റവ. ഡോ. വിൻസന്റ് വാരിയത്ത് ‘കുടുംബം ഒരു ആനന്ദം’ എന്ന വിഷയത്തിൽ നടക്കുന്ന ക്ലാസിന് നേതൃത്വം നൽകും. ആധുനിക ലോകത്ത് കുടുംബങ്ങൾ നേരിടുന്ന വെല്ലുവിളികളെയും, കുടുംബങ്ങളുടെ വളർച്ചയ്ക്കും വീണ്ടെടുപ്പിനും കുടുംബ ശുശ്രൂഷകൾ കൈവരിക്കേണ്ട നവമായ അജപാലന സമീപനങ്ങളെക്കുറിച്ചും കെ.ആർ.എൽ.സി.ബി.സി ഫാമിലി കമ്മിഷൻ സെക്രട്ടറി റവ. ഡോ. എ.ആർ. ജോൺ അവതരിപ്പിക്കും. ഉച്ചയ്ക്ക് ജ്വലിക്കുന്ന ഹൃദയവും ചലിക്കുന്ന പാദങ്ങളും എന്ന സെഷനിൽ വിവിധ ഫാമിലി മൂവ്മെന്റുകളിലുള്ളവർ തങ്ങളുടെ അനുഭവങ്ങൾ പങ്കുവയ്ക്കും. ഇതിൽ ഗ്രീൻ പാസ്റ്റേഴ്സിൽ നിന്നും ബോണി ചെല്ലാനം, ല വിത്ത മിനിസ്ട്രിയിലെ ഫാ. റോബർട്ട് ചാവറനാനിക്കൽ, ഗ്രേസ് കപ്പിൾസ് മിനിസ്ട്രിയിലെ അലക്സ് & എൽസ ദമ്പതികൾ, പ്രോ-ലൈഫ് കുടുംബങ്ങളായ കോട്ടപ്പുറം രൂപതയിലെ ഫ്രാൻസിസ് എം. എ & ഹെർമീന ഫ്രാൻസിസ്, തിരുവനന്തപുരം അതിരൂപതയിലെ ജാക്സൻ തുമ്പക്കാരൻ & ശ്യാമ ജാക്സൻ എന്നിവർ പങ്കെടുക്കും.
ഉച്ചയ്ക്ക് ശേഷം മൂന്ന് മണിക്ക് നടക്കുന്ന പൊതുസമ്മേളനം സെന്റ്. തെരേസാസ് കോളേജ് അവതരിപ്പിക്കുന്ന പ്രയർ ഡാൻസോടുകൂടി ആരംഭിക്കും. കെ.ആർ.എൽ.സി.ബി.സി ഫാമിലി കമ്മിഷൻ ചെയർമാൻ ബിഷപ് ഡോ. സെബാസ്റ്റ്യൻ തെക്കേത്തേച്ചേരിൽ അധ്യക്ഷത വഹിക്കുന്ന സമ്മേളനം കേരള വ്യവസായ വകുപ്പ് മന്ത്രി ശ്രീ. പി. രാജീവ് ഉദ്ഘാടനം ചെയ്യും. വരാപ്പുഴ അതിരൂപത സഹായ മെത്രാൻ ഡോ. ആന്റണി വാലുങ്കൽ അനുഗ്രഹ പ്രഭാഷണവും കെ.ആർ.എൽ.സി.സി ജനറൽ സെക്രട്ടറി റവ. ഡോ. ജിജു അറക്കത്തറ ആശംസകളുമർപ്പിക്കും. പ്രസ്തുത ചടങ്ങിൽ വിവിധ രൂപതകളിലെ കുടുംബ ശുശ്രൂഷകളിൽ നിസ്വാർത്ഥ സേവനം ചെയ്യുന്നവരെ ആദരിക്കും. അതോടൊപ്പം എല്ലാ രൂപതകളിൽ നിന്നുള്ള പ്രോ-ലൈഫ് കുടുംബങ്ങളെ ആദരിച്ച് സാമ്പത്തിക സഹായം വിതരണം ചെയ്യും. കെ.ആർ.എൽ.സി.ബി.സി ഫാമിലി കമ്മിഷൻ സെക്രട്ടറി റവ. ഡോ. എ.ആർ. ജോൺ സ്വാഗതവും വരാപ്പുഴ കുടുംബ ശൂശ്രൂഷ ഡയറക്ടർ ഫാ. അലക്സ് കുരിശ്പറമ്പിൽ കൃതജ്ഞതയും രേഖപ്പെടുത്തും. ജൂബിലി വർഷത്തിൽ നടത്തുന്ന ഈ നേതൃസംഗമം രൂപതകളിലെ കുടുംബ ശുശ്രൂഷ പ്രവർത്തനങ്ങൾക്ക് കൂടുതൽ ഊർജ്ജം പകരുമെന്നും അതുവഴി കുടുംബങ്ങളെ ചേർത്തുപിടിച്ചുകൊണ്ട് മുന്നേറുവാൻ സാധിക്കുമെന്നും സംഘാടകർ പറഞ്ഞു.
