1995 ല് മധ്യപ്രദേശില് വച്ച് കൊലചെയ്യപ്പെട്ട മലയാളി കന്യാസ്ത്രീ റാണി മരിയയുടെ ജീവിതം പ്രമേയമാവുന്ന ഷെയ്സണ് പി. ഔസേഫ് സംവിധാനം ചെയ്ത ‘ദി ഫെയ്സ് ഓഫ് ദ ഫെയ്സ്ലെസ്’ ഇതിനോടകം അന്താരാഷ്ട്ര വേദികളില് ശ്രദ്ധപിടിച്ചു പറ്റിക്കഴിഞ്ഞു. ഇപ്പോഴിതാ ചിത്രം ഓസ്കര് പുരസ്കാരത്തിനുള്ള യോഗ്യത പട്ടികയില് ഇടം നേടിയിരിക്കുകയാണ്.
ചിത്രത്തിനായി സംഗീത സംവിധായകന് അല്ഫോണ്സ് ജോസഫ് ഒരുക്കിയ മൂന്ന് ഗാനങ്ങളാണ് ഒര്ജിനല് സോങ് എന്ന വിഭാഗത്തില് ഓസ്കര് യോഗ്യത നേടിയിരിക്കുന്നത്. ആകെ വിവിധ ഭാഷകളില് നിന്നുള്ള 94 ഗാനങ്ങളാണ് ഈ വിഭാഗത്തില് മത്സരിക്കുന്നത്. ഇത് സംബന്ധിച്ച വിവരം ഓസ്കര് സമിതിയുടെ വെബ്സൈറ്റില് ലഭ്യമാണ്. ആകെ 94 ഗാനങ്ങളാണ് ഇപ്പോള് ഈ പട്ടികയില് ഇടം നേടിയിരിക്കുന്നത്. ഏക് സപ്നാ മേരാ സുഹാന, ജല്താ ഹേ സൂരജ്, മധ്യപ്രദേശിലെ ഗോത്ര വര്ഗവിഭാഗത്തിന്റെ തനിമയില് തയ്യാറാക്കിയ പാട്ടുകളാണ് ദ ഫെയ്സ് ഓഫ് ദ ഫെയ്സ്ലെസില് നിന്നും തിരഞ്ഞെടുക്കപ്പെട്ടിരിക്കുന്നത്.
പാരീസ് സിനി ഫിയസ്റ്റയില് ബെസ്റ്റ് വുമന്സ് ഫിലിം പുരസ്കാരവും കാനഡയിലെ ടൊറന്റോ ഇന്ഡിപെന്ഡന്റ്റ് ഫിലിം ഫെസ്റ്റിവലില് ബെസ്റ്റ് ഹ്യൂമന് റൈറ്റ്സ് ഫിലിം പുരസ്കാരവും ഉള്പ്പെടെ മുപ്പതോളം രാജ്യാന്തര പുരസ്കാരങ്ങളാണ് സിനിമ ഇതുവരെ സ്വന്തമാക്കിയത്. കൂടാതെ ന്യൂയോര്ക്ക് ഇന്റര്നാഷണല് ഫിലിം ഫെസ്റ്റിവലില് വിന്സി അലോഷ്യസിന് മികച്ച നടിക്കും സംവിധായകന് ഷെയ്സണ് പി. ഔസേഫിന് മികച്ച നവാഗത സംവിധായകനുമുള്ള പുരസ്കാരവും ലഭിച്ചിരുന്നു. റാണി മരിയയാകുവാന് വിന്സി നടത്തിയ മേക്കോവറും ഏറെ ശ്രദ്ധ പിടിച്ചുപ്പറ്റിയിരുന്നു. കേരളത്തിൽ ചിത്രത്തിന് മികച്ച സ്വീകാര്യതയാണ് ലഭിച്ചത്.
