മനുഷ്യാവകാശങ്ങളും സാമാന്യനീതിയും നിഷേധിക്കപ്പെട്ട സ്വന്തം വീടുകളും ജോലിസ്ഥലവും നഷ്ടപ്പെട്ട പാവപ്പെട്ട മത്സ്യത്തൊഴിലാളികളുടെ സമരത്തെ, തീവ്രവാദ ബന്ധം ആരോപിച്ച് തകർക്കാൻ ശ്രമിക്കുന്ന സർക്കാർ നിലപാട് അത്യന്തം പ്രതിഷേധാർഹമെന്ന് കോതമംഗലം രൂപത. വികസന പ്രവർത്തനമെന്ന പേരിൽ നടത്തുന്ന ഇത്തരം അപ്രഖ്യാപിത കുടിയിറക്കുകളെല്ലാംതന്നെ സമൂഹത്തിലെ പിന്നോക്ക വിഭാഗത്തിൽപെട്ടവരെയാണ് നാളിതുവര ഗുരുതരമായി ബാധിച്ചിട്ടുള്ളത്.
ഇത്തരം വൻകിട പദ്ധതികളുടെ ഭാഗമായി കുടിയിറക്കപ്പെട്ടവർക്ക് ന്യായമായ നഷ്ടപരിഹാരമോ ആനുകൂല്യമോ ഇതുവരെ ലഭിച്ചിട്ടില്ലയെന്നത് ചരിത്രപരമായ വസ്തുതയാണ്. വിഴിഞ്ഞത്തെ മത്സ്യത്തൊഴിലാളികൾ ജീവിക്കാൻ വേണ്ടി നടത്തിവരുന്ന ഐതിഹാസികമായ സമര പോരാട്ടത്തെ ഏതു വിധേനയും തകർക്കാനുള്ള സർക്കാർ ശ്രമങ്ങൾ ജനാധിപത്യ സമൂഹത്തിന് ചേർന്നതല്ല. കുത്സിത മാർഗ്ഗങ്ങൾ ഉപയോഗിച്ച് സമരത്തെ വഴിതിരിച്ചുവിടാൻ ശ്രമിക്കുന്നവരുടെ രാഷ്ട്രീയ താൽപര്യങ്ങളോടെയുള്ള കുബുദ്ധി, പ്രബുദ്ധ കേരളം ഇതിനോടകം തിരിച്ചറിഞ്ഞിട്ടുള്ളതാണെന്നും നിയമപരമായി നടന്നുവരുന്ന സമരത്തെ അക്രമാസക്തമായ അടിച്ചൊതുക്കി വിയോജിപ്പുകളെ കായികമായി കൈകാര്യം ചെയ്യുന്ന ശൈലി ജനാധിപത്യ കേരളത്തിന് ചേർന്നതല്ലെന്നും പ്രസ്ഥാവനയിൽ പറയുന്നു.
തീരപ്രദേശത്തെ പാവപ്പെട്ട മത്സ്യത്തൊഴിലാളികളോടൊപ്പം നിന്ന് അവർക്ക് നേതൃത്വം കൊടുക്കുന്ന തിരുവനന്തപുരം ലത്തീൻ അതിരൂപത ആർച്ച് ബിഷപ്പിനും സഹായ മെത്രാനുമെതിരെ അകാരണമായി കേസുകൾ ചാർജ് ചെയ്തിരിക്കുന്നത് ന്യായീകരിക്കാൻ ആവുന്നതല്ല. പാവങ്ങളുടെ സർക്കാർ എന്ന് അവകാശപ്പെടുകയും കുത്തക മുതലാളിമാരുടെ താൽപര്യങ്ങൾ സംരക്ഷിക്കാൻ ഏതറ്റം വരെയും പോകുന്ന രീതിയാണ് കേരളത്തിലെ സർക്കാർ ഇപ്പോൾ പിന്തുടരുന്നത്. നിലനിൽപ്പിനു വേണ്ടിയുള്ള സമരത്തെ തീവ്രവാദ പ്രവർത്തനമായും വർഗീയ സംഘർഷമായും അവതരിപ്പിക്കുന്ന ശൈലി അപകടകരമാണ്. അക്രമവും അപക്വവുമായ പ്രതികരണങ്ങളും ആരുടെ ഭാഗത്തു നിന്നായാലും ന്യായീകരിക്കാനാവില്ല. കേരളത്തിന്റെ മുഖ്യമന്ത്രി പ്രളയ സമയത്ത് രക്ഷാ സൈന്യം എന്ന് വിശേഷിപ്പിച്ച മത്സ്യത്തൊഴിലാളികളെ ഇപ്പോൾ തീവ്രവാദികൾ, വികസന വിരോധികൾ എന്ന രീതിയിൽ പൊതുസമൂഹത്തിൽ ആക്ഷേപിച്ച പ്രസ്താവനകളിറക്കുന്നത് സർക്കാരിന്റെയും രാഷ്ട്രീയപാർട്ടികളുടെയും അവസരവാദത്തിന്റെയും ഇരട്ടത്താപ്പിന്റെയും ഉദാഹരണങ്ങളാണ്. വിഴിഞ്ഞത്തെ തീരദേശ ജനതയുടെ പ്രശ്നങ്ങൾ പരിഹരിക്കാൻ സംസ്ഥാന സർക്കാർ ദുരഭിമാനം വെടിഞ്ഞ് മുൻകൈയെടുക്കണമെന്നും കോതമംഗലം രൂപത ആവശ്യപ്പെട്ടു.
