ഫാ. റോസ് ബാബു അംബ്രോസ് റോമിലെ അക്കാദമിയ അൽഫോൻസിയാന പൊന്തിഫിക്കൽ യൂണിവേഴ്സിറ്റിയിൽ നിന്ന് ധാർമിക ദൈവശാസ്ത്രത്തിൽ ഡോക്ടറേറ്റ് കരസ്തമാക്കി. “പരിസ്ഥിതി ശാസ്ത്രവും അനുകമ്പയും: ‘ലൗദാത്തോ സീ’ യും ബുദ്ധമതവും തമ്മിലുള്ള താരതമ്യപഠനം” (Ecology and compassion :a comparative study between Loudato si and Buddhism) ആയിരുന്നു ഗവേഷണ പ്രബന്ധം.
തന്റെ ഗവേഷണത്തിന്റെ ഭാഗമായി നടത്തിയ വിലയിരുത്തൽ പഠനത്തിൽ കാരുണ്യമെന്ന പുണ്യത്തെക്കുറിച്ചാണ് പഠിച്ചതെന്നും രണ്ട് മതങ്ങളിലും മനുഷ്യരോടും പ്രകൃതിയോടും ഒരുപോലെ കാരുണ്യം പ്രകടിപ്പിക്കുക എന്നതാണ് പ്രധാന ആശയമെന്നും അദ്ദേഹം വ്യക്തമാക്കി. ക്രിസ്തീയ വിശ്വാസത്തിൽ കാരുണ്യത്തിന്റെ മൂർത്തി ഭാവമായ ക്രിസ്തുവിന്റെ സാന്നിധ്യം കാണാനാവും. എന്നാൽ ബുദ്ധിസമെന്നത് ദൈവവിശ്വാസം ഇല്ലാത്ത ഒരു മതമായതിനാൽ തന്നെ ദൈവിക സാന്നിധ്യം അതിൽ കാണാൻ സാധിക്കുന്നില്ല എന്നും അദ്ദേഹം പറഞ്ഞു.
തിരുവനന്തപുരം അതിരൂപതയിലെ മുട്ടട വിശുദ്ധ കുരിശിന്റെ ദേവാലയാംഗങ്ങളായ പരേതരായ ആംബ്രോസ് അമല ദമ്പതികളുടെ മകനാണ് റവ.ഫാ. റോസ് ബാബു അംബ്രോസ്. പ്രാരംഭ പഠനങ്ങൾക്ക് ശേഷം ആലുവ കാർമൽ ഗിരി സെമിനാരിയിൽ ഫിലോസഫി പഠനവും തിയോളജി പഠനവും പൂർത്തിയാക്കുകയും 2006 ആർച്ച് ബിഷപ്പ് സൂസപാക്യം പിതാവിൽ നിന്ന് തിരുപ്പട്ടം സ്വീകരിക്കുകയും ചെയ്തു.
ഏതാനും വർഷം അതിരൂപതയിലെ വിവിധ ഇടവകകളിൽ സേവനം ചെയ്ത ശേഷം 2016ൽ ഉപരിപഠനത്തിനായി റോമിലേക്ക് പോയി. റോമിലെ അക്കാദമിയ അൽഫോൺസിയാന പൊന്തിഫിക്കൽ യൂണിവേഴ്സിറ്റിയിൽ നിന്ന് മോറൽ തിയോളജിയിൽ ലൈസൻഷിയേറ്റ് പഠനം പൂർത്തിയാക്കിയ ശേഷം അതേ യൂണിവേഴ്സിറ്റിയിൽ തന്നെ അദ്ദേഹം ഡോക്ടറേറ്റ് പഠനവും നടത്തുകയായിരുന്നു. ഡോക്ടറേറ്റ് പഠന സമയത്ത് ഇറ്റലിയിലെ വിവിധ ഇടവകകളിളും അദ്ദേഹം സേവനമനുഷ്ഠിച്ചിട്ടുണ്ട്.
